Concello de Verín

A área de Mocidade e Deporte do Concello de Verín e a Asemblea Comarcal de Cruz Roja Monterrei organizan o próximo 20 de xuño, a segunda edición do Día da Bici Solidaria.

Esta actividade, enmarcada dentro da campaña do Sorteo del Oro 2010, ten como obxectivo promocionar este deporte como actividade saudable e familiar, e recadar fondos, mediante a venda de boletos para este sorteo, para os proxectos que a Cruz Roja ten en marcha na comarca.

A ruta, cun percorrido de nove quilómetros de dificultade baixa, iniciarase ás 10 horas na praza Maior de Verín e finalizará na área deportiva de A Granxa, onde terá lugar a entrega de trofeos e sorteo de produtos doados polas empresas colaboradoras. O evento non posúe carácter competitivo e os trofeos serán os seguintes: ciclista novel -participante máis novo-, ciclista veterano -participante de maior idade- e premio familiar -destinado á familia cun maior número de participantes na ruta-.

Nesta edición non será necesario efectuar inscricións previas nin adquirir un boleto do Sorteo del Oro para participar no Día da Bici Solidaria, xa que a proba é de carácter gratuíto. Con todo, se os/as participantes queren optar a trofeos, agasallos e sorteos si que deben adquirir devandito boleto, cun prezo de cinco euros, e co que se lle entregará un dorsal de participación.