Concello de Verín

O Concello de Verín vén de recibir unha subvención de 663.994,76 euros, concedida pola Consellería de Presidencia, Xustiza e Deportes, como parte do fondo adicional ao Fondo de Cooperación Local. Esta axuda permitirá financiar o 50% do proxecto de mellora da liña de auga e da eficiencia enerxética da Estación Depuradora de Augas Residuais (EDAR) de Verín, cun investimento total de 1.327.989,52 euros.

Actuacións necesarias para un sistema sostible

Segundo destacou o alcalde de Verín, Gerardo Seoane, este proxecto dá resposta a necesidades críticas detectadas no sistema de saneamento e depuración de augas residuais. Actualmente, a EDAR opera por riba da súa capacidade, tratando 540 m³/h, cando o seu límite óptimo é de 340 m³/h. Ademais, as infiltracións na rede de saneamento dilúen as augas residuais, dificultando o proceso de depuración. A mellora proposta permitirá aumentar a capacidade de tratamento ata os 600 m³/h, garantindo un funcionamento eficiente e sostible.

Que accións se van a implementar?

• Modernización da EDAR: Tras 30 anos en funcionamento, renovarase o equipamento e os sistemas para adaptalos ás necesidades actuais e futuras, incrementando a capacidade e reducindo o impacto ambiental.

• Redución de infiltracións: Actuarase sobre a rede de saneamento para eliminar as infiltracións e impermeabilizarase o colector principal, evitando a entrada de augas pluviais.

• Aforro económico e ambiental: Estímase que o custo anual por vertidos reducirase de 200.000 a 50.000 euros, o que suporá un aforro anual de 150.000 euros para as arcas municipais.

Impulso á industria local

Este proxecto beneficiará sectores clave da economía da comarca, como as embotelladoras de auga mineral (Cabreiroá, Sousas e Fontenova), as adegas da Denominación de Orixe Monterrei e o matadoiro comarcal. As melloras garantirán un servizo eficiente para as industrias actuais e facilitarán a implantación de novas empresas.

Capacidade ampliada para novas áreas

A modernización permitirá incrementar a capacidade de tratamento da EDAR ata 600 m³/h. Isto posibilitará atender ás novas áreas industriais previstas no Plan Xeral de Ordenación Urbana e ás poboacións veciñas con sistemas de vertido deficientes, garantindo tamén soporte para futuros desenvolvementos urbanos e industriais.

Protección do medio ambiente

A actuación mellorará a calidade das augas vertidas ao río Támega, protexendo a biodiversidade desta zona incluída na Rede Natura 2000. Este proxecto beneficiará tanto á flora e fauna coma ao sector turístico, reforzando a imaxe de Verín como un destino sostible.

Compromiso co desenvolvemento sostible

Este proxecto enmárcase nos Obxectivos de Desenvolvemento Sostible (ODS) da Axenda 2030, reforzando o compromiso de Verín cun crecemento equilibrado que combine eficiencia económica, respecto polo medio ambiente e benestar social.

«O noso compromiso é co futuro de Verín e da súa comarca. Esta reforma da EDAR é esencial para garantir un servizo eficiente, reducir custos para a cidadanía e mellorar o medio ambiente. É un proxecto que reforza a nosa economía local e asegura un desenvolvemento sostible e competitivo», salientou Gerardo Seoane, alcalde de Verín.