Concello de Verín

O Concello de Verín, a través da súa área de Feiras, vén de anunciar a celebración da feira de produtos naturais ecolóxicos e de proximidade "O Mellor da Terra", un evento que terá lugar os días 19, 20 e 21 de xullo en Verín. A mesma ten o obxectivo de dar visibilidade aos pequenos produtores da industria alimentaria, brindando unha plataforma única para exhibir unha ampla gama de alimentos de primeira calidade, saudables e innovadores.

Segundo explicou o concelleiro responsable da área de Feiras, Manuel Lorenzo, o obxectivo de "O Mellor da Terra" é constituír un gran escaparate de produtos naturais, ecolóxicos e de proximidade de primeira calidade. «Este evento é unha excelente oportunidade para que todos aqueles pequenos produtores que non teñen a capacidade de chegar a grandes superficies, pero que son fundamentais para o tecido económico da nosa rexión, cheguen de maneira efectiva e directa ao consumidor final».

A feira contará con, aproximadamente, 35 expositores dentro dunha carpa de 50 metros cadrados. Os asistentes poderán saborear unha ampla variedade de produtos de máxima calidade, non procesados, e que son vitais e insubstituíbles polo seu papel na saúde e no benestar do consumidor; así como no desenvolvemento das diferentes economías locais. O horario da mesma será: venres, de 17:00 a 21:00 horas; e sábado e domingo, de 11:00 a 21:00 horas.

Entre os produtos que se poderán degustar, destacan unha ampla variedade de embutidos, queixos, cecina e morcilla, procedentes de Zamora, León e Burgos, así como setas e conservas. Para os amantes dos doces poderán degustar galletas e mel, entre outros e para os afeccionados ás bebidas tamén contarán con interesantes opcións; como licores, cervexa artesá ou un posto de cócteles premium.