Concello de Verín

O Concello de Verín foi un dos catro escenarios elixidos para promover a protección do recurso hídrico a través da arte muralista, grazas á segunda edición do Concurso de Murais “People & Planet”. Esta iniciativa, organizada polo Fondo Galego de Cooperación e Solidariedade e financiada pola Unión Europea, reúne propostas de artistas de diversas partes do estado para ilustrar o Obxectivo de Desenvolvemento Sostible número 6: garantir a dispoñibilidade de auga e a súa xestión sustentable e o saneamento para todas as persoas.

No caso de Verín, o deseño gañador é obra do artista valenciano Noé Peiró, titulado “A parte do xardín que non regas, murcha; se o regas por igual, non”. A súa creación, que foi pintada no muro de acceso a zona verde de A Preguiza, destaca pola súa capacidade de criticar e reflexionar sobre a escaseza e contaminación da auga. O mural divídese en tres partes, utilizando distintas intensidades de cor dentro da mesma gama cromática, para chamar a atención sobre a diferenza entre a abundancia e a carencia do líquido vital. «Esta obra non só busca capturar a atención visual senón tamén fomentar o propio pensamento crítico por parte da comunidade», salientou a concelleira responsable da área de Cultura, Samanta Barreira, quen tamén quixo agradecer ao artista o seu excelente traballo.

Este concurso é unha plataforma para que artistas como Noé Peiró poidan non só exhibir o seu talento senón tamén transmitir unha mensaxe de vital importancia para a sustentabilidade. Ademais, os muralistas gañadores serán recompensados cunha viaxe sostible a Cabo Verde, onde terán a oportunidade de coñecer a realidade deste país africano e a labor do Fondo Galego.

Ademais do mural do artista valenciano, as propostas de Mikel Erkiaga “O importante”, Isa Bermúdez “A viaxe”, e Raúl del Carmen “Cando o río Soa” -pintados en Moeche (A Coruña), Poio (Pontevedra) e Viveiro (Lugo), respectivamente- resultaron ser as que, segundo a organización, mellor ilustran o Obxectivo de Desenvolvemento Sostible número 6 que chama a “garantir a dispoñibilidade de auga e a súa xestión sustentable e o saneamento para todas as persoas”

#PeopleAndPlanet

O proxecto ‘People & Planet: un destino común’ busca concienciar as mozas e mozos europeos sobre as graves consecuencias do cambio climático para que se convertan en axentes de transformación na procura dun mundo máis sustentable. A iniciativa, que botou a andar en novembro de 2020 e que se prolongará durante catro anos, reforza tamén aos gobernos municipais na promoción de políticas a prol do desenvolvemento sostible, tendo en conta a interdependencia local-global. Procúrase así contribuír a implementar a Axenda 2030. O plan está financiado polo programa DEAR da Comisión Europea e involucra a 17 entidades de Galicia, Portugal, Alemaña, Irlanda, Italia, Polonia, Romanía, Países Baixos e Cabo Verde.

Sobre o ODS 6: Auga limpa e saneamento

Os Obxectivos de Desenvolvemento Sostible (ODS) son 17 metas globais adoptadas polos Estados membros da ONU para erradicar a pobreza, protexer o planeta e asegurar a prosperidade para todas as persoas para 2030. O ODS 6 destaca a necesidade de garantir que toda a poboación teña acceso a auga potable de calidade. Con esta campaña, o Concello de Verín reafirma o seu compromiso coa Axenda 2030 e co desenvolvemento sostible.

Concretamente, o ODS 6 pon de relevo que hai suficiente auga doce no planeta para que todos os seus habitantes teñan acceso a ela, pero boa parte da poboación está afectada pola súa escaseza ou mala calidade. No entanto, podemos entender esta problemática nun sentido amplo, tal e como establece a campaña ‘Water of the future’: medidas para aforrar auga, pegada hídrica, a situación noutros lugares, activismo contra a contaminación dos ríos e os océanos, reivindicación de espazos protexidos, etc.

O Fondo Galego de Cooperación e Solidariedade

O Fondo Galego de Cooperación e Solidariedade, que conta con 108 concellos e as deputacións de Pontevedra, A Coruña e Lugo, traballa para concentrar os esforzos da cooperación ao desenvolvemento. Con máis de 27 anos de experiencia, o Fondo Galego ten apoiado uns 200 proxectos en máis de trinta países e promove numerosas actividades de sensibilización en prol da solidariedade internacional.