Concello de Verín

O 7 de novembro, ás 20:00 horas, o Salón de Actos da casa da Cultura acolle a presentación do libro "A árbore do pan", obra escrita por Edelmiro Mateo e ilustrada por Olimpia Seoane.

"A árbore do pan", como adoitaban chamar ao castiñeiro en tempos antigos debido á súa importancia como fonte de alimento antes da chegada da pataca, é unha obra que nos mergulla na vida da castaña e o seu pai, o castiñeiro. A través desta narración, descubrimos a sabedoría que a natureza encerra, se tan só aprendemos a ler os seus sinais. A contorna do bosque de castiñeiros revélase como unha sociedade organizada cun propósito común: alcanzar a felicidade.

Este texto, escrito por Edelmiro Mateo, cobra vida a través das ilustracións en acrílico creadas por Olimpia Seoane, unha pintora verinesa autodidacta. A súa colaboración converte este relato nunha verdadeira obra de arte, onde as imaxes e as palabras fusiónanse para levar ao lector a unha viaxe única e emocionante.