Concello de Verín

Esta mañá comezaron no colexio Princesa de España, con máis de 200 nenas e nenos inscritos, a Ludoteca de verán "Convive en Igualdade" e o Campamento urbano 2023, dúas actividades municipis de conciliación familiar destinadas a menores de 3 a 15 anos que buscan cubrir o tempo de lecer da cativada con propostas lúdicas e educativas.

Na xornada inaugural, os menores gozaron dunha multitude de divertidas e variadas actividades tales como os seus primeiros xogos de presentación, a busca de tesouros e do impostor, manualidades e moitas outras. Ademais, as rapazas e rapaces recibiron a visita de Rosario Rodríguez, concelleira de Benestar Social, e Manuel Lorenzo, concelleiro de Feiras Transporte e Xuventude, que se achegaron ata o centro educativo para darlles a benvida.

Estes servizos, deseñados para cubrir o tempo de lecer dos máis pequenos, terán lugar desde hoy 22 de xuño até o 8 de setembro, de luns a venres, con diferentes horarios adaptados ás idades dos nenos e contando cun equipo cualificado de nove monitores de tempo libre, doce xoves de voluntariado xuvenil e persoal en prácticas.

A Ludoteca de Verán está dirixida a nenos e nenas de idades comprendidas entre os 3 e 10 anos. As actividades programadas inclúen animación á lectura e contacontos, actividades acuáticas, cine infantil, obradoiros medioambientais, reciclaxe creativa, fotografía, música, xogos de auga, entre outros. Tamén haberá festas temáticas como o San Fermín, Festa do Sombreiro, Festa Hippie, Festa Eibisenca, Festa Pirata e Festa Flamenca.

O Campamento Urbano está pensado para nenos e nenas de 11 a 15 anos. Durante este campamento, realizaranse acampadas nocturnas, sendeirismo, xogos olímpicos, obradoiros de pintura, actividades acuáticas, visitas a lugares de interese da zona e moitas outras actividades lúdicas e deportivas.