Concello de Verín

A Asociación de Empresarios de Verín (AEVER) vén de anunciar una nova edición  da súa campaña comercial "Eu Merco en Verín". Esta iniciativa, que conta coa colaboración do Concello de Verín, ten como obxectivo dinamizar as rúas e promover as vendas nos establecementos asociados.

Segundo informaron esta mañá José Ángel Rodicio e Santos Álvarez, presidente e xerente de AEVER respectivamente, a campaña dará comezo o luns 19 de xuño, cunha duración de 11 días, culminando coa celebración dunha serie de actividades especiais o día 30 de xuño. Durante ese día, os clientes que realicen compras nos establecementos participantes poderán acceder ás mesmas mediante a entrega dos tickets de compra correspondentes.

As actividades que se realizarán o día 30 de xuño inclúen inchables, pasarrúas, xogos interactivos e –como novidade- os denominados  “xogos desenchufables”, pensados para que a mocidade desconecte, polo menos por un día, do ocio baseado na tecnoloxía. O horario de mañá de 11:00h a 13:30h e de tarde de 17:30h a 20:30h.

Para participar nelas, os clientes deberán obter os tickets mediante as súas compras nos establecementos asociados. Os tickets poderanse canxear na carpa de AEVER, que estará situada na praza do Concello e que estará aberta unha hora antes do inicio das actividades. O mecanismo de canxe é o seguinte:

• No horario de mañá, será necesario entregar 3 tickets de compra xunto con 5€ e realizar o canxe na carpa de AEVER, para obter unha pulseira de cor azul, que permitirá o acceso a todas as actividades durante a mañá.

• En horario de tarde, tamén será preciso entregar 3 tickets de compra xunto con 5€ e realizar o canxe na carpa de AEVER, para obter unha pulseira de cor verde, que permitirá o acceso a todas as actividades durante a tarde.

• Para gozar de acceso durante todo o día, os clientes deberán entregar 3 tickets de compra xunto con 7€ e realizar o canxe na carpa de AEVER, para obter unha pulseira de cor VERMELLA, que dará acceso a todas as actividades durante toda a xornada.

Ademais, AEVER terá dispoñible na súa páxina web unha aplicación para realizar reservas e compras de entradas.

Segundo destacou o presidente de AEVER, José Ángel Rodicio, «o obxectivo desta campaña é incrementar o atractivo da zona, impulsar as vendas, fomentar a mobilidade dos clientes polas rúas comerciais e facilitar a conciliación familiar. Mentres os nenos desfrutan das actividades durante esas tres horas, os pais poderán mercar tranquilamente».

Rodicio aproveitou tamén a ocasión para expresar o seu agradecemento pola colaboración incondicional do Concello de Verín e dos seus traballadores, «os cales sempre mostran unha total disposición para facilitar todos os trámites e accións organizativas necesarias. A súa participación activa sempre é fundamental para o éxito das nosas campañas».