O presidente da comisión de seguimento do PCT Puertas de Galicia, Juan Manuel Jiménez Morán, e o xerente do mesmo, Ignacio Fernández Dosil, presentaron esta mañá a Guía Turísticas de Puertas de Galicia.
Durante a presentación, á que tamén asistiron os alcaldes dos municipios pertencentes o plan Puertas de Galicia e a diputada electa por Ourense Carmen Pardo, amosouse este novo proxecto turístico que detalla información natural, patrimonial e histórica de cada un dos doce municipios adheridos a este plan e que conforman o xeodestino Verín-Viana (Castrelo do Val, Cualedro, Laza, Monterrei, Oímbra, Riós, Verín, Vilardevós, A Gudiña, A Mezquita, Viana do Bolo e Vilariño de Conso), así como recursos económicos máis significativos destas comarcas: o viño da Denominación de Orixe Monterrei.
Esta guía ten como obxectivo crear conciencia de territorio e traballo en común para desenvolver un destino turístico cohesionado, que permita promocionar conxuntamente os importantes recursos existentes e así competir no mercado turístico. A mesma elaborouse cos propios concellos, xa que foron os que aportaron a información individualizada de cada un e cederon algunhas das fotografías que ilustran estas páxinas turísticas.
O Plan de Competitividade Portas de Galicia está promovido por Turespaña, Secretaría Xeral para o Turismo da Xunta de Galicia e doce municipios (Castrelo do Val, Cualedro, Laza, Monterrei, Oímbra, Riós, Verín, Vilardevós, A Gudiña, A Mezquita, Viana do Bolo e Vilariño de Conso), integrados na Asociación de Municipios para o Plan de Competitividade Turística das comarcas de Monterrei e Conso-Frieiras, e a Asociación de Empresarios de Turismo e Hostalería Portas de Galicia. Entre os obxectivos deste plan están a busca de especialización tanto no destino como no produto, deseñar unha oferta capaz de introducir a experiencia turística como elemento motivador da viaxe, así como a busca da mellora da competitividade das PEMES e MPEMES turísticas para lograr a sostenibilidade do territorio. |