Concello de Verín

Persoas expertas das Nacións Unidas, da Unión Mundial de Gobernos Locais ou da Confederaçao dos Municípios Brasileiros participarán nas IX Xornadas do Fondo Galego de Cooperación e Solidariedade que se celebran en Vigo o vindeiro 10 de decembro, Día dos Dereitos Humanos. A Casa Galega da Cultura acollerá os debates sobre o horizonte que se abre tras os Obxectivos de Desenvolvemento do Milenio que marcan a folla de ruta da cooperación internacional entre os anos 2000 e 2015.

“Felicita o Nadal as persoas maiores de Verín que están soas cunha postal solidaria”. Baixo este lema os departamentos de Educación Familiar e Servizos Sociais-Maiores do Concello de Verín promoven, un ano máis, a iniciativa 'Postais Solidarias Interxeracionais'.

Desde o departamento de Desenvolvemento Local do Concello de Verín infórmase da publicación das bases reguladoras da primeira convocatoria correspondente ao exercicio 2015 de concurso público para a concesión de bolsas internacionais da Deputación Provincial de Ourense. Toda a información no seguinte link.

O director da AECT Eurocidade Chaves-Verín e alcalde de Verín, Juan Manuel Jiménez Morán, o membro da Asamblea Eurocidade e vice-presidente da Câmara Municipal de Chaves, Carlos Augusto Castanheira Penas, presidiron na tarde de hoxe a sinatura do primeiro convenio de cooperación transfronteiriza xuvenil na Unión Europea realizado entre dúas asociacións de Chaves e Verín: Asociación Xuvenil “A Voz da Juventude” e “Asociación Xuvenil Entroideiros”.

'Camiños da Guitarra Clásica Galega' é o concerto que interpretará na Casa da Cultura de Verín o venres día 5 de decembro, ás 20.15 horas, o recoñecido músico e investigador Samuel Diz (Tui, 1986). O acto, de libre acceso, está patrocinado por Turismo de Galicia. O concerto enmárcase na xira de presentación do disco Guitarra Clásica Galega (Ouvirmos, 2012).

Samuel Diz está graduado no Conservatorio Superior de Música Manuel Castillo de Sevilla. Nos cursos de Música en Compostela recibiu o Premio Andrés Segovia. Ten actuado en diferentes países dos continentes europeo, americano e africano, destacando a súa presentación en The Council on Latin American and Iberian Studies-CLAIS da prestixiosa Yale University (EE.UU), no Harare International Festival of the Arts-HIFA (Zimbabwe), ou o seu recente debut como solista no Palau da Música Catalana, no que recibiu o Premio da Crítica polo “estudo e coherencia do programa, seguridade escénica e son diáfano”.