Concello de Verín

Os alcaldes da Mancomunidade de Municipios de Verín subscribiron o sábado 29 de outubro a declaración institucional que recolle o compromiso explícito destes municipios co medio ambiente do val, a adopción de políticas de sustentabilidade e o respecto ao medio ambiente. Con todo, o tenente de alcalde de Verín, Diego Lourenzo, fixo un chamamento ao desenvolvemento concreto de proxectos que poderían optar ata a 20 millóns de euros.

O Festival Internacional de Curtametraxes de Verín -VÍA XIV- inicia oficialmente a súa  axenda de eventos cun completo Ciclo de conferencias culturais e audiovisuais, que terá lugar durante os días 8, 15, 23 e 30 de novembro, enfocado a realizar un primeiro acercamento ás temáticas oficiais do festival -Emigración, Fronteiras e Entroido- e a propia Vía XIV, como elemento vertebrador das mesmas.

Os alumnos do IES García Barbón contan xa, para este ano lectivo, cunha nova App para dispositivos móbiles. Esta nova ferramenta dixital forma parte dunha tripla guía, que xunto coa súa versión web e o seu equivalente en papel, integran un completo recurso tecnolóxico multiplataforma que busca optimizar o acceso dos alumnos a toda a información básica sobre o funcionamento do centro e os servizos que ofrece.

O cine comercial volta a Verín dende este venres, cunha programación especial centrada nos filmes de estrea do xénero de terror para a ponte de Defuntos. O Goberno municipal retoma así o que califica como “exitoso experimento”, segundo o alcalde, Gerardo Seoane, “para fixar poboación as fins de semana na vila”, que concluíu na primeira metade do ano con 6.000 espectadores.

O sábado 29 de outubro, ás 18:00 horas, terá lugar a terceira xornada sobre o medio ambiente e farao cun acto histórico: a asina da Declaración de Verín en defensa do medio ambiente e o río Támega por parte de todos os alcaldes pertencentes á Mancomunidade de Municipios e a Presidenta da Asociación Cultural Monterrei, Cultura e Territorio Neves Amado.