Concello de Verín

Dende o día 01 ao 04 de outubro, a Eurocidade Chaves-Verín organiza a IV Semana da Educación e Seguridade Viaria, destinada a sensibilizar a poboación de ambos municipios, especialmente aos máis novos, das diversas formas correctas de comportamento en educación e seguridade viaria.

Técnicas municipais de Ourense, Malpica de Bergantiños e Soutomaior viaxan esta semana a Nicaragua e Cabo Verde para colaborar con parceiros do Fondo Galego de Cooperación e Solidariedade. Os tres municipios son socios da entidade e, polo tanto, os seus empregados e empregadas poden participar en Vacacións con Traballo, o programa de voluntariado internacional que promove o intercambio de experiencias e o coñecemento directo da realidade dos países do Sur.

O vindeiro domingo 30 de setembro, a localidade de Verín acollerá o I Circuíto de Andainas Saudables, coa realización dunha andaina de nove quilómetros, organizada polo Plan Galicia Saudable, Vegalsa-Eroski, a área de Deportes do Concello de Verín e Asociación Ruta das Augas.

A sede da Eurocidade Chaves-Verín (antiga aduana de Feces de Abaixo -Verín-) acollerá o vindeiro 8 de outubro, de 9.30 a 14 horas, unha xornada de formación especializada para dar a coñecer as distintas posibilidades que  ofrece a Unión Europea en materia de xuventude, organizada pola Dirección Xeral de Xuventude e Voluntariado da Consellería de Traballo e Benestar.

Uns 150 participantes, dos municipios de Chaves e Verín, asistiron á 5ª Andaina da Eurocidade Chaves-Verín, realizada o sábado 22 de setembro, pola ‘Ruta polo Camiño Portugués Interior de Santiago – Vidago/Chaves’.