Concello de Verín

O FIC Vía XIV de Verín proxectará, en colaboración co histórico Cineclub Nosferatu, dous filmes fundamentais para  a hisitoria do cinema universal: Alcanzaron o transbordador (Carl Theodor Dreyer, 1948) e Arrière-saison (Dimitri  Kirsanoff, 1950). Será o sábado, 7 de setembro, ás 18.00h na Casa da Cultura de Verín.

A vila de Verín foi, dende hai décadas, un berce creativo para profesionais e amadores do sétimo arte. Moito antes  do nacemento do FIC Vïa XIV, algunhas emblemáticas salas da vila acollían proxeccións e debates promovidos  dende os diferentes cineclubes locais. Na edición anterior do FIC Vía XIV, a cineasta local Sabela Souto, da man  das propias veciñas que viviran aqueles tempos, organizou unha actividade na que se destacou a importancia  que os distintos cineclubs tiveron ao longo dos anos para a formación da cultura cinéfila local.

Nesta edición, o FIC Vía XIV quere poñer o foco nunha daquelas históricas propostas, a do Cineclube Nosferatu,  dirixido por Daniel Dapía e Manuel Ayán, que destacaba pola singularidade e ambición da súa proposta. Da man  destes dous persoeiros referentes para a vila, o festival inaugura un novo espazo entre as súas actividades  paralelas; que abre as súas portas cunha primeira sesión na cal se proxectarán dúas curtametraxes  fundamentais da historia do cinema: Alcanzaron o transbordador (Carl Theodor Dreyer, 1948) e Arrière-saison  (Dimitri Kirsanoff, 1950), xunto a unha presentación crítica dos mesmos e un coloquio final aberto á participación  do público.

“Con esta nova actividade, queremos reivindicar a importancia que teñen os espazos como os cineclubes para  fomentar o pensamento crítico dos espectadores. Desde o FIC sempre buscamos crear un lugar onde o cine non  só se vexa, senón que tamén se reflexione e se debata, permitindo que o público se involucre activamente nos  temas que estas obras suscitan. O novo espazao Nosferatu será unha oportunidade única para reavivar o diálogo  e a análise crítica, elementos esenciais que fan do cine un poderoso motor de cambio na nosa sociedade.”,  salientou Carlos Montero, director do certame.

A través desta actividade, a equipa do FIC Vía XIV quere poñer en valor o traballo de todas as persoas que, ao  longo dos tempos, puxeron o seu gran de area para convertir a Verín no que é agora: o gran punto de encontro da  cinema da contorna. Dende o Festival convidan a todos a veciñanza a acudir a esta actividade na que, ademais  de poder gozar destes filmes, poderemos descubrir como impactou o antigo cineclube Nosferatu na cultura  cinematográfica da vila.