Concello de Verín

Este venres 26 de xullo, os nenos e nenas da Ludoteca e do Campamento Urbano de Verín desfilarán polas rúas da vila no "Desfile da Ludobatucada", dando a benvida a Batucada 2024. A actividade, que este ano xira arredor da temática "doces", fará a súa saída ás 11:00 horas dende o edificio de educación infantil do CEIP Amaro Refojo de Verín “Módulos”.

Este ano, os nenos e nenas que participen no desfile realizarán unha colorida e festiva representación de diversos tipos de doces e lambetadas como caramelos, pasteis, xeados e outros doces, enchendo as rúas da vila de alegría e cor.

Os pequenos desfilarán cara á Praza do Concello para realizar unha foto con todos os participantes, incluíndo os integrantes de Portas Abertas e os alumnos do colexio de Castrelo do Val. Este momento será seguido por actuacións de baile a cargo de varios grupos de nenos e nenas, que amosarán as súas habilidades e o traballo en equipo desenvolvido ao longo do campamento.

Unha vez finalizados os bailes, dará comezo o percorrido circular que partirá da Praza do Concello e pasará pola Rúa Laureano Peláez, Praza da Mercé, Rúa da Cruz e Praza García Barbón. A música e o baile continuarán a acompañar aos participantes ata rematar na tradicional "Festa Infantil da Ludoteca" no CEIP Amaro Refojo.

Este evento non só dá inicio a Batucada 2024, senón que proporciona unha forma de diversión para os nenos e nenas da Ludoteca e do Campamento Urbano de Verín.