Concello de Verín

O vindeiro xoves 27 de abril, ás 19:30 horas, A Biblioteca do Concello de Verín acollerá a conferencia “Francisco Fernández del Riego: Galicia no corazón. Letras Galegas 2023”, impartida por Francisco Domínguez e María Dolores Cabrera, padroeiros da Fundación Fermín Penzol.

Na conferencia, os relatores realizarán un percorrido pola figura de Francisco Fernández del Riego, destacando a súa faceta como escritor, intelectual e galeguista, aglutinador da cultura galega ao redor da Fundación Penzol e a Editorial Galaxia.

Quico Domínguez, perito industrial en Vigo, enxeñeiro industrial en Bilbao e doutor pola Universidade de Vigo, exerceu a súa actividade profesional na empresa privada durante máis de trinta anos e posteriormente incorporouse á Universidade de Vigo. Un galeguista de corazón, incorporouse ao movemento en 1965, da man de Xaime Isla Couto, fundador e secretario de organización do Partido Galeguista.

Por outro lado, María Dolores Cabrera Iglesias é licenciada en Filosofía e Letras, sección Historia, pola Universidade de Santiago de Compostela, e traballou como docente en Vigo. Tamén colaborou cos equipos de elaboración do Catálogo Colectivo do Patrimonio Bibliográfico Galego en diferentes bibliotecas da provincia de Pontevedra. A súa paixón polo libro galego levouna a publicar varios traballos de investigación, así como a colaborar en diferentes publicacións periódicas.

Ambos padroeiros da Fundación Penzol, colaboraron na elaboración de diversos libros, entre eles Fermín Penzol. Unha obra para un país (2010) e Francisco Fernández del Riego. Vigo no corazón de Galicia (2013), xunto a outras colaboracións sobre a figura de Francisco Fernández del Riego.

A conferencia “Francisco Fernández del Riego: Galicia no corazón. Letras Galegas 2023” supón unha oportunidade única para coñecer máis sobre a figura deste escritor e galeguista destacado.