O delegado territorial da Xunta de Galicia, Rogelio Martínez, e o alcalde de Verín, Juan Manuel Jiménez Morán, entregaron esta mañá os diplomas aos/ás participantes nos cursos de accións formativas para desempregados impartidos polo Concello de Verín e a Mancomunidade de Municipios da Comarca de Verín.

No acto, no que tamén estiveron presentes os rexedores de Monterrei e Oímbra, José Luis Suárez e Alfonso Villarino respectivamente, destacouse a importancia deste cursos, destinados a dar resposta as actuais demandas do mercado, a través dun proceso formativo no que se une a parte teórica coa práctica. Por parte do Concello de Verín impartíronse dúas accións formativas, Monitor/a de Educación Ambiental e Dinamizador/a de actividades de tempo libre educativo infantil e xuvenil, entre un total de 27 alumnos/as. No de Monitor/a de Educación Ambiental, cun total de 300 horas, analizáronse cuestións como: introdución ao medio natural, problemática ambiental, conceptos xerais da educación ambiental, psicopedagoxía do aprendizaxe neste ámbito, características e rol do monitor en educación ambiental o seguridade e hixiene no traballo, entre outros. Mentres que no de  Dinamizador/a de actividades de tempo libre educativo infantil e xuvenil, de 310 horas, centrouse na organización, dinamización e avaliación de  tempo libre educativo dirixidas á infancia e a xuventude, no marco da programación xeral dunha organización, aplicando as técnicas específicas de animación grupal, incidindo explicitamente na educación en valores e atendendo ás medidas básicas de seguridade e prevención de riscos.

No caso da Mancomunidade de Municipios da Comarca de Verín, os/as alumnos/as participantes recibiron formación en cursos como auxiliar de enfermería en xeriatría, técnico administrativo de seguros, técnico auxiliar en deseño de interiores e celador sanitario.