Concello de Verín

Manuel Quintas Martínez, un neno verinense de sete anos de idade, obtivo o terceiro premio no VII Concurso de felicitacións de Nadal da web oficial do piloto Fernando Alonso (www.fernandoalonso.com).

O presidente da Xunta de Galicia, Alberto Núñez Feijóo, o secretario xeral para o Deporte, José Ramón Lete Lasa, e o delegado territorial da Xunta, Rogelio Martínez, acudiron hoxe a Verín para inaugurar as novas instalacións da Piscina Climatizada do municipio.

A directora da Oficina de Rehabilitación do Casco Histórico de Verín, Patricia Varela, viaxa o vindeiro 23 de novembro para Cuba como participante do programa ‘Vacacións con Traballo’. Esta iniciativa de voluntariado en países do Sur está impulsada polo Fondo Galego de Cooperación e Solidariedade, do que a administración local forma parte. O obxectivo é que os profesionais galegos intercambien coñecementos teóricos e prácticos coas entidades de acollida, á vez que se visibilizan os proxectos cofinanciados pola asociación de Concellos e Deputacións.

O Concello de Verín organiza un obradoiro para aprender a facer o disfrace de cigarrón, ben sexa completo ou partes desta máscara. Os/as interesados/as poden inscribirse até o día 26 de novembro na Casa do Concello, na oficina de información (planta baixa).

A Casa da Cultura de Verín acolleu, na xornada de hoxe, a entrega de diplomas do curso de ‘Alfabetización Dixital’, organizado pola Fundación Galicia Emigración, en colaboración con Academia Postal e a Oficina de atención ao Inmigrante do Concello de Verín, e na que estiveron presentes o director xerente da Fundación Galicia Emigración, José Manuel Castelao Bragaña, a coordinadora de programas da mesma fundación, Vanessa Ucha Fernández, o alcalde de Verín, Juan Manuel Jiménez Morán, e a concelleira de Benestar Social, Luisa Valladares Rodríguez.