Concello de Verín

A ludoteca e o campamento urbano municipais, organizados pola Oficina Municipal de Información Xuvenil da área de Benestar Social do Concello de Verín, están a vivir a súa semana grande con divertidas actividades variadas. Despois de rematar a semana pasada con iniciativas relacionadas coa auga, como a excursión ao parque acuático Naturwaterpark ou o inchable piscina tobogán de auga, esta semana ofrécense propostas moi diversas que culminarán o venres 28 de xullo co tradicional desfile da “Ludobatucada”.

Os días 28 e 29 de xullo, Verín celebrará a súa tradicional festa da batucada, un evento que cada ano reúne a milleiros de persoas arredor da música, o baile e a diversión. O programa oficial da festa inclúe actividades para todos os públicos e gustos, desde desfiles infantís e concertos ata festa da espuma e este ano, como novidade, unha batalla de batucadas. Así o confirmou esta mañá a concelleira de Cultura, Festexos e Turismo, Samanta Barreira, que presentou o programa oficial acompañada de Javier M. Quintas, xerente da empresa verinesa Elogo Delivery, patrocinadora do evento.

O FIC 2023, que se celebrará na vila do Támega entre o 8 e o 17 de setembro, xa conta con cartel ilustrador. Un traballo cuxa idea conceptual parte de Jorge Godás, responsable de Creatividade e Multimedia do certame, que foi realizada pola axencia coruñesa The Office. Inspirada na película británica Brazil, de Terry Gilliam, a idea creativa do cartel ilustrador susténtase nunha crítica velada á intelixencia artificial seguindo o universo distópico que propón o filme. "Ante o control absoluto, só nos queda loitar pola imaxinación e a liberdade de pensamento nun mundo que podería resultar opresivo", defende Jorge Godás, autor intelectual do cartel.

A Biblioteca Municipal de Verín vén de recibir o premio María Moliner de proxectos de animación á lectura en concellos de menos de 50.000 habitantes, correspondente ao ano 2023, pola súa iniciativa “Voluntariado cultural con rapaces/as s para o fomento da lectura”. Deste  xeito, a Biblioteca verinesa recibirá 2.772,22 euros financiados polo Ministerio de Cultura e Deporte, que serán destinados a compra de libros e/ou publicacións periódicas.

A Asociación de Comerciantes e Empresarios de Verín, Aever, apoiará de novo o desenvolvemento do FIC Vía XIV propoñendo, como en anos anteriores, a posta en marcha dun concurso que inste aos seus establecementos da vila a decorar os seus escaparates con motivos relacionados coa sétima arte.