Concello de Verín

A Gala de Nadal de AEVER volve ao Pavillón Deportivo de Verín o próximo 4 de xaneiro ás 18:00 horas, cunha proposta familiar chea de humor, música e circo da man de Fran Rei e Félix Rodríguez, que traerán á vila o espectáculo Saaabor de Nadal!, acompañados polas actuacións de Paco Nogueiras e Zirko Txosko.

A entrada será de balde, pero deberá obterse a través das compras realizadas nos establecementos asociados a AEVER, un sistema que vincula directamente a celebración da Gala co apoio ao tecido comercial da vila. A entidade lembra que o obxectivo non é só facilitar o acceso ao evento, senón visibilizar o papel do comercio local como dinamizador esencial da vida económica e social de Verín. Neste sentido, cada ticket obtido mediante as compras converte a asistencia nun xesto de respaldo a un sector que contribúe de forma decisiva á actividade diaria da comarca.

Nesta edición, a Gala estará protagonizada por Fran Rei e Félix Rodríguez, que traerán á vila o espectáculo Saaabor de Nadal! da man de Culturactiva Producións. Dirixida por Avelino González e coa escenografía de Kukas, a peza combina música, maxia, humor, ritmo e participación do público, ofrecendo un “menú do día” tan saboroso como sorprendente. Os dous intérpretes dan vida a dous recoñecidos cociñeiros que elaboran unha proposta escénica chea de xogos, imaxinación e referencias á gastronomía propia destas datas, pero tamén a mensaxes vinculadas ao consumo responsable, á alimentación saudable e á importancia de apoiar o comercio da contorna. No seu repertorio conviven desde villancicos populares ata a célebre Marcha Radetzky, sempre filtrados polo espírito festivo e cómico que caracteriza aos artistas.

A tarde completarase con actuacións que reforzan o carácter familiar e diverso da Gala.

Paco Nogueiras é pura dinamita escénica para público familiar. Coa enerxía dun directo que non dá respiro e un humor que conecta de inmediato con cativos e adultos, Nogueiras transforma cada actuación nun pequeno festival. Os seus espectáculos —Brinca Vai!, Radio Bulebule ou Extra!— recorreron Galicia enteira e valéronlle dous Premios Martín Códax da Música, consolidándoo como unha das voces máis recoñecidas e queridas da música infantil galega. Cantante, actor e narrador a partes iguais, é capaz de mover a todo un pavillón entre xogos, coreografías e historias cantadas

Xunto a el, Zirko Txosko levará ao pavillón un número de circo contemporáneo cargado de técnica, humor e frescura. A compañía formada por Ariñe Azkue e Óscar Páez chega a Verín tras anos de formación e traballo en escolas e compañías de España, Italia e Arxentina. Acrobacias, equilibrios e técnicas aéreas conviven cun risco totalmente real que mantén ao público en tensión e gargalladas a partes iguais. A proposta mestura teatro, comicidade e participación do público, convertendo cada número nun xogo no que a sorpresa é constante.
Ademais, a Gala contará cunha vertente solidaria grazas á presenza do colectivo Miquiños que instalarán os seu stand informativo no Pavillón Deportivo. A través deste espazo, a asociación dará a coñecer o seu labor social e de protección animal, co obxectivo de sensibilizar e implicar ao público infantil ao tempo que recadarán fondos para continuar desenvolvendo os seus proxectos, convidando ao público asistente a colaborar e implicarse nunha causa solidaria que forma parte activa do tecido asociativo da vila.
Con esta programación, AEVER reafirma o seu compromiso coa dinamización comercial e cultural de Verín. Desde a asociación explican que o comercio local “forma parte da identidade da vila e sostén boa parte da súa actividade diaria”, e lembran que cada compra realizada nos establecementos asociados contribúe a manter vivo ese tecido económico. A Gala de Nadal quere reforzar esa idea converténdose nun punto de encontro festivo que consolide Verín como un Centro Comercial Urbano activo e atractivo, ao tempo que recoñece o labor de todas as persoas e entidades que colaboran para facer posible esta cita anual.

Dinamización musical nas rúas o sábado 20 de decembro e concurso de escaparates para animar as compras do nadal en plena campaña dos 6000 de Verín.

O sábado 20 de decembro en horario de 17:00 a 19:00 AEVER CCU promove unha dinamización musical co obxectivo de incrementar o atractivo da vila e animar á clientela a realizar as súas compras de nadal nun entorno alegre e festivo. A agrupación Nova Era será a encargada de realizar un pasarrúas con paradas en varios puntos que agrupan a diferentes establecementos comerciais. Ademais dende AEVER CCU tamén se ten promovido un concurso de escaparates no que os clientes e clientas son o xurado. O concurso de escaparates reforza a idea xa consolidada de que o comercio local contribúe a que a vila proxecte unha imaxe navideña e festiva. As persoas que realizan compras en calquera comercio local asociado poden votar polos escaparates que máis lle gusten a través dun formulario disponible na páxina web de AEVER. Cada tique de compra da dereito a emitir un voto. Entre as persoas que participen neste xurado, sortearanse 3 pasaportes de compras de 50€. Os establecementos que resulten gañadores do concurso de escaparates, tamén recibirán o seu recoñecemento en forma de pasaporte para mercar no comercio local.

Estas actividades e dinamizacións suceden en plena campaña “Os 6000 de Verín” que culminará con sorteo de 6000 euros repartidos en 19 premios o día 24 de decembro. As persoas que fan as súas compras nos establecementos participantes poden depositar as súas participación nas caixas habilitadas nos comercios ata o día 23.

O ximnasio do Pavillón Municipal de Deportes de Verín será o escenario dun novo obradoiro temático de creación de coroas florais de Nadal. O mesmo está organizado polo Concello de Verín, en colaboración coas florerías locais da vila; realizándose esta edición coa Florería Lirios. Será o sábado 20 de decembro, de 16:00 a 20:00 horas.

Esta iniciativa ten como obxectivo non só celebrar a temporada festiva, senón tamén fomentar a participación activa da comunidade na creación dos seus propios adornos de Nadal, contribuíndo así á dinamización do comercio local.

Ao longo deste obradoiro temático, os participantes terán a oportunidade de mergullarse no espírito do Nadal mentres crean adornos únicos e especiais. A colaboración coas florerías locais engade un toque auténtico e comunitario a esta experiencia, destacando a importancia de apoiar e promover o comercio local. A inscrición para o evento ten un custo de 25 euros e pode realizarse directamente na propia Floraría Lirios (rúa Deputación, 23. baixo).

Colaboración coas florarías de Verín

Cada ano, este obradoiro correra a cargo dunha das florarías de Verín (sempre que queiran adherirse a esta iniciativa). Deste xeito, todos os negocios florais da vila iránse rotando enriquecendo a calidade do taller e conseguindo unha participación equitativa de todos os comercios florais locais.

O Concello de Verín, en colaboración coa Asociación Vía XIV, inaugura o vindeiro sábado 20 de decembro ás 20:15 horas na Sala de Exposicións Municipal a mostra fotográfica “Alén do lago”, do fotógrafo verinés Carlos Folgoso Sueiro, Premio Galicia de Fotografía Contemporánea. A exposición poderá visitarse ata o 31 de xaneiro, en horario de 10:30 a 14:30 h; e de 16:00 a 18:30 h. (luns a venres).

O Concello de Verín vén de presentar a programación oficial de Nadal 2025–2026, un calendario composto por máis dunha vintena de propostas que se desenvolverán entre o 13 de decembro e o 6 de xaneiro. A oferta combina accións impulsadas directamente polo Concello coa colaboración activa de numerosas entidades locais que, un ano máis, contribúen a enriquecer a vida social e cultural da vila durante estas datas.

O Auditorio Municipal de Ourense acolleu esta noite DEZ, o concerto co que a Banda de Gaitas Nova Era de Verín celebrou a súa primeira década de vida cun aforo case completo e unha resposta do público á altura da ocasión. Máis de 70 músicos ourensáns reuníronse sobre o escenario para repasar a traxectoria dun proxecto que hoxe é xa un referente no panorama cultural galego. A través de diferentes suites musicais, o grupo levou ao público por ritmos tradicionais, pasaxes contemporáneas e pezas creadas especificamente para esta celebración, construíndo unha narrativa musical que percorre os dez anos que fixeron posible Nova Era.

“Foi realmente emocionante xuntar tantas caras coñecidas sobre o escenario. Foi, sen dúbida, o concerto desta década. E agardamos que quede no recordo do público como o fai no noso”, sinalou a dirección artística ao remate. A entidade avanzou tamén que, a finais de ano, o resultado deste espectáculo poderá desfrutarse en formato audiovisual, nun vídeo que recollerá a esencia dun concerto que marcou un antes e un despois na historia da banda.

A cita foi tamén un encontro simbólico co pasado e co futuro do proxecto. Sobre o escenario conviviron músicos que deron os primeiros pasos na formación con novas incorporacións que achegan frescura e novas influencias. “Celebramos unha década xuntos, pero tamén celebramos a idea de que a música galega pode reinventarse sen medo. Queríamos compartir esa enerxía coa nosa xente, coa que estivo desde o principio, e con quen se achegou por primeira vez a nós”, explicaba o director, Álvaro Isaac Rúa. O repertorio, que revisitaba pezas históricas e estreaba arranxos creados para a ocasión, mesturou o formato clásico de banda de gaitas co universo da orquestra e mesmo coa linguaxe do jazz, amosando unha convivencia natural entre tradición e vangarda que foi recibida cunha ovación unánime.

“A idea de DEZ foi difuminar totalmente os límites musicais que se presupoñen nunha formación como a nosa. Queremos sentar as bases dun concerto que sexa referencial e quede para o recordo, e por iso o nivel de detalle e agarimo volcado neste espectáculo chegou a novas cotas. É moi diferente e moito máis refinado que calquera outro produto no que traballamos anteriormente, e para lograr chegar a esa meta rodeámonos de músicos de primeiro nivel de fala galega”, comenta Dani García, director e produtor do espectáculo.

Dez anos despois, Nova Era segue a defender que a música tradicional é tamén unha ferramenta de identidade e cohesión social. O seu traballo, desenvolvido dende Monterrei, converteuse nun exemplo de como a creación cultural pode revitalizar o tecido social e ofrecer novas oportunidades artísticas na comarca.

Dez anos facendo comunidade a través da música

Fundada no Val de Monterrei en 2014, a Banda de Gaitas Nova Era converteuse nun dos proxectos máis singulares do panorama galego. Ao longo desta década levou a súa música a escenarios como o Festival Internacional do Mundo Celta de Ortigueira, Francia, Portugal ou a República Checa.

A traxectoria de Nova Era caracterízase pola constante exploración de novas linguaxes musicais. O seu primeiro traballo discográfico, “Rumbo NE”, xa marcaba esa dirección: unha viaxe sonora na que conviven muiñeiras galegas, swing americano, salsa cubana, música celta e ritmos balcánicos, combinados coa potencia expresiva da gaita galega e das diferentes seccións instrumentais da banda. A súa estrea, o 28 de decembro no Auditorio de Verín, reuniu a máis de corenta músicos e contou coa colaboración de artistas de referencia como Óscar Ibáñez, nunha gala que consolidou o proxecto como un dos máis orixinais do panorama galego.

Desde aquela, Nova Era seguiu ampliando horizontes con propostas como o EP “Outros Compases: Cara A”, o espectáculo “Voces dunha nova era”, o documental “oriXes. Dez anos de Nova Era” e as Xornadas Culturais Nova Era, que cada verán dinamizan o centro de Verín con foliadas, obradoiros e cantos de taberna.

Con “DEZ”, a banda celebra un camiño no que a experimentación e o compromiso coa cultura local seguen a ser o seu mellor sinal de identidade.