A empresa de telecomunicacións R promove, en colaboración co Concello de Verín, dous concertos no municipio para dar a coñecer os servizos que oferta aos/ás cidadáns/as, dentro do circuíto ‘Xpressionk en Ruta R 2010’

O primeiro deles, do grupo Álvaro Muras, terá lugar o vindeiro domingo 23 de maio, a partir das 20 horas na Praza García Barbón. No mesmo esta formación coruñesa de funk fusión instrumental, creada por Álvaro Muras, amosará unha variedade de estilos dentro dun repertorio propio con momentos de improvisación e interactividade co público.

Mentres que o domingo 30 de maio, á mesma hora e sitio, actuará Qando Vand. Un grupo da localidade de Betanzos formado por 8 compoñentes, que interpretarán cancións de funk rock con pinceladas de rap, reggae, ska, hard rock, jazz, rock psicodélico e soul.

O circuíto ‘Xpressionk en Ruta R 2010’ visitou, na súa anterior edición, os concellos de Melide, A Estrada, O Grove, Foz e Mondoñedo.