O mércores 17 de novembro, ás 20:00 horas,  o Centro Dramático Galego representará no Auditorio do Concello de Verín a obra teatral “O Charco de Ulises”, unha versión libre da Odisea traspasada a un contexto atlántico polo seu autor, Santiago Cortegoso. Do mar ao océano. De Ítaca a Galicia. De Troia a Buenos Aires. Do Mediterráneo ao Atlántico.

“O charco de Ulises”, dirixida por Marián Bañobre e Santiago Cortegoso, trata da viaxe como concepto vital da existencia do ser humano no tempo, trata dos movementos migratorios, do  multiculturalismo, da necesidade —ou non— de traspasar calquera fronteira. Fai una relectura do clásico universal de Homero contextualizándoo nun fenómeno sociolóxico que marcou a historia do pobo galego.

As entradas xa está dispoñibles en ataquilla.com por 10 euros.